Hüt sind mir nonemol 9 Std. dur dä Etoshapark gfahre…..und hend vieli Tier gseh und vieli Tier gföttelet….

Au hüt hämer wieder än Hufe Zebra gseh….aber s high light sind 2 Leue gsi! Ein isch grad vor üsem Auto über d Stross glaufe – i ha dä Fotti gar nöd so schnäll parat gha, drum gseht män halt nume no vo hine! Em andere hend mir däfür bim Frässe chöne zueluege, er isch grad näb dä Stross im Gebüsch versteckt gläge.
Will üsi Permit für dä Ufenthalt im Etoshapark am 12 i abglaufe isch, sind mir denn is Camp gfahre und hend dä Nomitag am Pool verbrocht.

Hüt Morge sind mir scho früe losgfahre zum Tier a dä Wasserstelle z finde…mir hend si denn au zu Hunderte gfunde! Will alles so dürr und troche isch (s hät do sit ca. 2 Johr nüme grägnet) müend Tier wiiti Wäg uf sich neh um Wasser zfinde und denn wieder wiit zrugg go um irgendwo no ä bitzeli dürrs Gras oder ä paar Blätter zfinde – und das 2 mol am Tag!

Uf üsere hütige Fahrt dur dä Etosha-Nationalpark sind mir so richtig „gsandet“ worde – s hät uf äm ganze Wäg fescht gluftet und alle Sand ufgwirblet! Mängmol ischs fascht wie dur Näbel fahre gsi…Aber mir hend än Huufe Tier gseh!

Jetzt sind mir also i dä berüehmte Etosha! Und mir sind bis jetzt nöd enttüscht worde! Unterkunft isch super – zu üsem Chalet häts än Sitzplatz mit Liegestüehl, Sonneschirm, Lounge-Sofa und kliinem Mini-Bade-Pool!!!
Trotzdem hend mir denn no än Safariusflug gmacht – s isch super gsi und mir di einzige 2 Gäscht…
Leue hend mir zum Schluss au no gseh! aber s isch zum Föttele leider scho z dunggel gsi.

Noch äre wiitere Holperstaubstrossefahrt hend mir üses Auto bi dä Palmwag Lodge parkiert und sind denn vo mä „Safari“ 4 x 4 – Jeep ca. 1 1/2 Std. samt allem Gepäck is Camp gfahre worde – s isch ä ziimli holprigi Fahrt gsi…
Denn hend mir 2 tolli Täg wiit ab vo allem gnosse – am 2. Tag sind mir di einzige Gäscht gsi und hend tolle „privat“ Service gha…