Noch änere fahrt dä dä Mondlandschaft entlang sind mir wiiter übere ziemlich holprigi, staubigi Stroosse bis zu üsem Ziel gfahre. Am morge hend mir aber zerscht no ä Bewilligung uf äme Büro müesse go hole, dämit mir überhaupt i das Gebiet hend dörfe fahre…S isch ziemli warm gsi – aber am Nomitag hend mir üs denn däfür chöne chli abchüele und zobig bim dusse Znachtesse hend mir denn langi Hose und warmi Pulli agleit! Mir sind do ebe würkli im Wüeschteklima: Nacht chalt – Tag sehr heiss…

Uf üsem hütige Uusflug id Mondlandschaft vo Swakopmund hend mir ganz spezielli Pflanze kenneglärnt…

Namibiaedelweiss

Lebende Steine

Welwitschia, die komisch Pflanze isch eigentlich än Baum!, hät nume 2 Blätter, wo aber im Lauf vom johrhunderti lange Läbe zerfransed und denn wie vieli Blätter usgsehnd. Das Exemplar do uf dä Fotti isch ca. meh als 800 Johr alt!!!!

Und no zwei wo i dä Name nümme weiss, aber mir sehr guet gfalled

Hüt hend mir ä ganz tolli Wüeschte-Düne-Safari gmacht. Zäme mi äme englische Ehepaar und üsem Guide sind mir ca. 5 Std. durch d Wüeschti gfahre: Düne ufe, Düne abe, Düne rundume…mängmol hend mir gmeint mir siged ufere Bahn a dä Basler Herbschtmäss…
Immer wieder isch üse Guide zum Auto usegumpt, i Düne gsprunge und hät agfange mit dä Händ dä Sand wägbuddle…und hät so Blindschliiche, Spinne, Gekos, Eidächse und Schlange gfunde und üs zeiget!
Di chlie Schlange isch übrigens ziemli giftig, für äs Chind chan än Biss tödlich si, au vor äm Skorpion hät dä Guide rächt Respekt gha…di chli Blindschliiche (uf dä Hand) isch mege härzig gsi, d Eidächsli sind wahnsinnig schnell Düne ufegrennt und in Geko han i mi grad verliebt, isch halt eifach eis vo miene Lieblings-Tier! Und für d Seline: s Chamäleon gseht zwor wie äs gföhrlichs Tier us – isch aber nume harmlos und sehr härzig!

Wär gseht was???

Uflösig:
Ãœse Tour-Guide hät zu mir gseit: gib mir mol diini Kamera, die hät ä mega Makro….mir hettet die Auge niemols gseh….

Noch churzer Fahrt wo mir immer wieder so riesigi Näschter vo dä Gsellschaftsvögel gseh hend, sind mir uf dä wunderschöne Farm scho vor äm Mittag iitroffe und hend üs für ei Nacht iigrichtet….mir hend än ruhige sommerwarme Nomitag am Pool und uf äm Sitzplätzli vo üsem Zimmer verbrocht. Noch Tee und Kueche mit dä Farmlüt sind mir uf en churze Obigspaziergang gange, sind dur alli di viele Geisse und Schof glaufe und hend denn spöter mit dä Farmlüt und dä andere Gäscht ame laaaaange Tisch än feine Znacht gnosse! S isch luschtig so wie in äre grosse Familie z sie – s git no spannende Gspröch und Informatione.

Sand, Sand, Sand – Sand so viel mä will – riesigi Sändälihüfe für d Seline, dä Mael und d Emilia und alli wo wönd sändele…
Mir hend hüt än Usflug i di grosse Sanddüne gmacht. S isch sehr iidrücklich und au sehr heiss gsi – sicher wiit über 30 Grad – toll! Wo mir den id Lodge zrugg cho sind hend mir üsi Openair-Duschi vo üsem Hüsli gnosse und versuecht dä Sand wieder los zwärde…

Noch churzer Fahrt, sind mir guet i dä Fest Inn Fels Lodge a cho – ä ganz tolli Alag! S hät us döt mega gfalle – mir hettes meh als ein Tag döt usghalte! Dä Nomitag hend mir denn gfulenzt und sind im Schatte am Pool gläge und hend äs Bier trungge.. Zobig sind mir mit äm Lodgebesitzer durchs Farmland gfahre und hend alti Buschmann Jagd- und Wohnstätte bsuecht – s sind allerdings meh oder weniger Felshölene oder Felsvorsprüng gsi wo chli Schutz bote hend – nöd sehr komfortabel…

Noch äre lange Staubstroosfahrt hend mir üsi Lodge erreicht, Zimmer bezoge, ich bi im Pool go bädele und dä Urs hät Charte- und Reisestudium gmacht. S isch sehr warm do, sicher gueti 30 Grad – i gnüsses und äm Urs ischs scho bald chli zwarm….

Hüt sind mir noch Lüderitz, äm einzige Hafe vo Namibia gfahre und denn wiiter zu verschiedene Meerbuchte.
Unterwägs hend mir ä schöni Gruppe Orix und Flamingos und uf äm Retourwäg wildi Ross gseh, das hett dä Regula und dä Seline sicher gfalle!
Am Meer häts so fescht gstürmt, dass mir fascht nümm hend chöne stoh und laufe – isch luschtig gsi! Trotzdem han is gschafft, dä Kofferruhm vom Auto chli usezputze und vo dä digge Sandschicht zbefreie – s isch zwor vergäbni Müe gsi, uf dä Heimfahrt sind mir in än rächte Sandsturm gfahre…uf dä Stross häts statt Schneeverweiige eifach Sand gha und statt dä Schneeflogge isch Sand uf s Auto und uf d Schiebe prasslet!

Di hütig fahrt isch ca. 3 3/4 Std. über Staubstrosse, durch ä schöni abwechsligsriechi Landschaft gange – s isch wenig Verchehr gsi: mir hend atroffe: 2 Rüppellstrappe (isch än Vogel) 2 Gruppe Springböck, 1 Kudu, 1 Steinböckchen, einigi Strausse, än Geisshirt mit siine Geisse und sogar 1 Auto!
Nochhär ischs uf ca. 120 km schnurgrader Teerstross wiitergange. S hät nöd würkli meh Verchehr ka – 1 Laschtauto hend mir überholt und ca 5 Auto sind üs entgegecho und ein Orix isch am Strosserand gstande…Eifach Wüeschtilandschaft, ohni Hüser und Mensche…